踏入2006年以來最炎熱的日子，籌備4個月，一連2日o既香港海洋生物相片分享日之二，再一次選擇係西貢海濱公園舉行啦!! 因為係第二次舉辦相展，今次由選擇地點、相片分類、相片數量都想同之前唔同。最後因為時間關係，最終決定返回西貢舉行。

　　今次我地選用「香港海洋，我們的驕傲！」為主題，相片數量增加到104張，真要多謝各方潛友支持。

　　相展當日，各義工們一早齊集西貢，由設置相板、貼相，佈置，個個都先黎出身汗做個熱身運動。2日相展中，雖然出現唔少技術性問題，不停地影響我地一班義工o既士氣。但係原來我地擔心o既問題，對觀賞者黎講，相片先至係真正主角。

　　每當參觀者行近相板，個個都露出驚訝、欣賞、好奇、同埋讚歎o既表情，我地一班義工終於放下心頭石，開始努力地講解相片生物比參觀者聽，從中帶出愛護海洋o既訊息。

　　今次相展，我發覺竟然無人再講呢條魚點煮法好，果隻蟹點炒法靚。哈！唔知呢個係唔係第一次相展o既結果呢？如果係，我再變一次黑人都無所謂！