<三週年前奏篇> 嘩嘩嘩……三歲喇!!! 不經不覺陪著我在潛水圈子成長的HKDIVER巳經踏入三週年. 為了隆重其事, 早在一月份一班搞手們巳經開始著手籌備工作. 由租借場地, 遊戲設計, 獎品安排, 搜羅紀念品, 經過多番討論, 開會商議, 終於有了全盤計劃. 可以出通告通知各位大花報名參與. 報名情況亦相當踴躍, 更勝往年.

<三週年進行篇>
天公做美, 天氣何其的好還有大藍水附送! 二零零六年三月十八日正是HKDIVER三週年慶典舉行的日子. 在各大花最熟悉的西貢海邊 – 海灣餐廳 舉行這個聚會, 實在意義重大.
四時正, 大班搞手已聚集到會場作最後準備 – 接待處, 座位安排, 紀念品, 遊戲道具, 抽獎禮物, 人手安排等等.

六時正, 各大花陸續到場, 大家都不見得陌生, 吹水環節更是大花們的必備節目. 潛聚力的幹事更開了攤擋擺賣 潛聚力 T-SHIRT, 吸引了不少大花圍觀選購. 連路過的老外都被吸引到, 即場購貨.

期待已久的三週年慶典於七時正正式開始, 先由司儀簡單介紹整晚宴會的流程. 繼這些例牌菜後, 大會播放一輯由大師精心炮制的短片給各大花們欣賞. 短片內容講述了HKDIVER版聚及潛聚力過去一年所舉辦的海陸空活動, 其他大花到外地旅遊時所拍下的精彩照片. 在座各觀眾的笑聲此起彼落, 高聲叫囂, 拍案叫絕, 欣賞得津津樂道. (賣下廣告先, 潛聚力搞咁多活動, 唔入會就笨啦)

咁高興, 大家都係時候冷靜下. 我地有請我地既主席 – 水佬 出黎同大家講幾句說話 (佢今時今日時常以瘦身代言人身份出場) 可能佢知自己講得多俾人噓, 所以佢再邀今次活動的幕後大搞手 – 小桃 出黎講番下.

為了營造一個團結而和諧的氣氛, 搞手們各排了一系列的考合作, 考團結, 考腦力, 考體力的遊戲給各大花參與. 事前要各出席者自備一隻生雞蛋, 以作遊戲其中的主要道具.

第一個遊戲 (BUDDY齊DESCEND) 於晚飯期間進行, 每組要用大會所提供的物料保護四隻雞蛋, 完成後, 會由高處摘下……看看有多少雞蛋能幸保不失, 絲毫無損. 眼見好多大花都費盡心力, 極力保護自己組員的雞蛋. 連飯都唔食, 不停諗計仔, 諗下點樣先可以跌落地無事.

最後海馬組以三隻完整的雞蛋獲得勝出

遊戲二 (蛙人GO!GO!GO!)– 每組派出四名隊員到沙灘進行比賽. 遊戲準則是四位隊員輪流穿著蛙鞋, 用匙羹運送雞蛋到終點, 以時間最快的為勝出. 水底有唔同的踢FIN方法, 但原來陸上著蛙鞋, 都有好多步走方式架 – 暴走式, 倒後式, 總之各式其式. 在場觀眾都笑到碌地沙.

海兔組果然係名符其實, 同兔仔一樣跑得咁快. 勝出第二個遊戲.

遊戲三 (快手快腳GEAR UP)– 每組派出四名隊員完成四項挑戰, 以時間最快者為勝出.

第一關 – GEAR UP, 相信各位大花對這個項目都不會陌生, 出海必做. 搬樽, SET樽, 著WETSUIT, 著FIN, 帶MASK……在過程中, 可以見到大家的功力. 有些大花相信要再上過O仔堂先得啦!!!

第二關 – 椰絲尋O-RING. 只用口, 不用手……係一碗椰絲度搵番個O-RING出黎有幾難, 相信只有玩果個先知.

第三關 – 吹象拔. 升水好多時候, 我地都雖要打象拔……依家係陸地, 我地唯有係吹氣球. 我地以氣球來代表象拔……務求要吹爆佢.

第四關 – SNORKLE 飲啤酒, SNORKLE 入水大家都試過, 但相信SNORKLE 飲啤酒都係第一次見. 龜兔賽跑咁, 海龜組後來追上, 勝出第三個遊戲.

<三週年壓軸篇> 經過三輪遊戲的激戰, 最後賽果係由<海馬組>獲得全場大獎. 各組員瓜分這份重量級獎品.

遊戲結束, 最緊張的時刻先剛剛開始 – 抽獎時間!!! 事前搞手們搜羅各式各樣的潛水用品作為抽獎禮物包括斯巴丹旅遊…用既防水袋, 帛流旅遊…用既指南針, PG旅遊…用既手套等等. 我地請出我地既會長同副會長為我地抽出幸運兒, 大家都睇到得獎者有幾咁開心呢!!!

所有獎品送出後, HKDIVER 的 BANNER 又要出動啦!! 當然要來張全體大合照以示三週年慶典完完滿滿開開心心咁結束. 各大花盡慶而歸, 抽唔到獎, 都仲有HKDIVER 三週年的紀念品 – 印有潛水相的 LUGGAGE TAG. LUGGAGE TAG 上的水底相, 經過搞手們精挑細選下選出, 每個人都稱心滿意!!

最後再次鳴謝各幕後搞手 –

小桃, 雲妮, PETE, YOHO, DANNY, 小蟬, 大師兄, 肥鯨, 龍, 66, 照相師 - klee (排名不分先後)