潛聚力－活動後記

純氧急救及減壓病講座 (2004年11月27日)
Please click here for english summary

作者: 會員朱朱

11月尾，天氣終於涼到透，雖然我"囤積居奇"咁，有 build in 既5mm，幾時落水都唔多怕凍，但係睇住D buddy 收晒爐，都唯有乖乖就範，屋企行下企下。

坐到悶悶，又到星期六，見新伊館有個純氧急救同減壓病講座，趁未發霉，聲起行去八，話晒無水潛，打發下時間都好丫。

講真，新伊館起咁多年，都唔知佢有個會議室。去到大門口，仲愁緊點搵之際，就見到大大個箭咀指向個會議室。~諗死個會議室實會好細好焗，點知都幾有規模喎...真係大鄉里。

一入去就見人頭湧湧，聚好多人係度，唔少舊 buddy 乘機 reunion，猛講果D潛點有幾好玩，見到幾多好，o的水有幾通透得幾通透，攪到我又身痕添！難得連十年都唔出現老潛友都俾我遇番幾個，睇個講座都幾有吸引力，引到D老蛇都出哂洞！

．潛友聚首．

．李醫生介紹減壓病理論．

吹完一輪水，講座終於開始。司儀好簡單咁 kick off，就請主辦單位話事人 Alex 哥哥出介紹下。原來佢係一群香港潛水員自發非牟利組織，目的係希望推廣潛水安全和環境保護，怪唔得佢第一炮活動就請係香港潛水界好知名李智騰醫生 (Dr. Ronson Li) 作為呢個純氧急救同減壓病講座主講者。

Ronson 業界都相當有名，即使純氧急救呀，減壓病呢o的咁專業既範疇，佢都可以有限既時間入邊，扼要咁介紹減壓病背景同理論，仲深入淺出，圖文並茂咁講解現行普遍治療方法。

．Dr. Ronson Li
李智騰醫生．

．潛友學習氧氣使用．

坦白講，上完O仔之後都冇乜再過減壓病，小弟亦唔知原來潛完水之後頭暈呀，身痕呀都可能係減壓病既徵狀，真係唔講唔知。相信今次有好多聽眾同小弟一樣，都係第一次學到減壓病治療方式，更開心係可以第一次親手接觸到氧氣樽，我重趁冇人留意時，吸幾啖純氧，果然係"聞一聞舒筋活絡，索一索提神醒腦"，真係獲益不少！

Ronson 成個講座中除佐理論之外，仲分享好多我呢挺普通潛水員未必有機會接觸到潛水問題同一D佢見過 case。佢仲話歡迎我搵時間去參觀下個減壓倉。聽佢講完，真係好想即刻飛去望一望係點。

．李醫生分享各種罕見 case．

．潛友發問各種潛水醫療問題．

講座後，我當然係冇蝕底，捉住 Ronson 係咁問一D同潛水醫療有關問題，佢亦好有耐性咁一一解答我，又 jetso ！！

聽講佢好快又會去參觀消防處潛水拯救車，真係唔好蝕底，等我快D去報名先。

~ 完 ~

返回活動區

www.diverskinetic.org